Sino ang dehado?

Babala: Sensitive ang mga pictures. Based ito sa actual na nangyari.

Hulyo 18, Lunes, Gabi.

Kumain kami mga bandang 6:30 ng gabi. Pagkatapos ay nag-hugas ako ng mga pinagkainan at nag-after clean ng lahat. Nang ako ay tumungo sa banyo, nakita ko ang isang maliit na daga o yung tinatawag na bubwit. Sumigaw kaagad ako,

"Syet!, may dagaaaaaaaaa!!!"

Natakot ako ngunit para bang natakot din siya at siniksik niya ang kanyang sarili sa isang sulok at hindi gumagalaw. Tinawag ko ang bunso sa amin at pinakuha ko agad-agad ang alaga niyang pusa (puti at may asul na mga mata). Ganoon ako ka desperada na mawala iyon at mapatay na (ayoko talaga ng daga sa bahay o kahit anong pesteng creatures, sino ba hindi db?).

Ngunit ang pusa ay tila bagang ayaw magpakita at nawawala. Kung kailan kailangan siya saka naman wala. (Bwiset yon', pag kakain kami lagi na lang biglang susulpot, minsan pa nga ay magugulat ka talaga sa kanya.)

Sigaw pa din ako ng sigaw, "Hanapin niyo, dali..." Di kasi gumagalaw yun daga. Mainam kako at madali siya mahuhuli. Dumating na ang kapatid ko dala ang pusa. Hinagis niya kung nasaan ang daga. Ngunit medyo "stupid" yun pusa, at di niya napansin. Hanggang sa pinagdildilan na ng kapatid ko. Finally, nakita at kinagat kagad niya yun nakakainis na bubwit. Lumabas ang pusa patungo sa sala, bitbit sa kanyang bibig ang bubwit. Kanya-kanya kami ng reaksyon. Ang pinsan ko na may ginagawa sa may laptop ay biglang napahinto. Ganoon din ang kapatid ko na si Carina, na nagrereview. Ako at si bunso ay sumunod sa sala at pinagkatuwaan namin lahat ang eksena nung pusa at daga. Tuwang-tuwa kami na nanunuod. At naisipan pa namin na kunan ng litrato. Nakakapagtaka lang kung ano ang tumatakbo sa isip nung pusa. Bakit kasi ayaw pa niya kainin at talagang pinaglalaruan pa niya ang bubwit. Hahayaan niya na maglakad si bubwit, pagkatapos ay bigla niyang susunggaban. Aakto pa ang pusa na dahan-dahan naglalakad, na may matang lumiliksi na nakatanaw sa daga at biglang susunggaban. May pagkakataong pa na parang i-eat bulaga niya ang bubwit. Nakakatawa. Kada galaw niya sa bubwit ay kinukunan namin ng picture (tamang trip lang).

Bulaga!

Kawawang BUBWIT

Maya-maya ay napansin namin na hindi na gumagalaw ang kawawang bubwit. Pag tinitigan mo pa nga ay mapapansin mo na hinihingal na siya at tila ba malalagutan na siya ng hininga, mamamatay na. Pero patuloy pa din ang pusa. Nung nagsawa na siya ay ginamit na niya ang kanyang matatalim na ngipin, kinagat, nginuya, kinain, nilunok. Wala na ang bubwit. Wala na rin ang tawanan. Bigla na kami nandiri. Nang aming i-preview ang mga pictures, naawa kami sa bubwit. Aming pang ini-zoom ang mga larawan at nakita namin ang lupaypay niyang katawan. Kita ko na para bang gusto niya kumawala pero wala siyang laban.

Naalala niyo ba ang TOM and JERRY series? Isang cartoon show na talagang na hook ang lahat. Ito ay cartoon cat at mouse duo. Dito kasi ay pinagtatawanan natin ang pusa, si Tom dahil sa lagi siyang naiisahan ng maliit ngunit matalinong daga, si Jerry. Kahit anong patibong pa ang kanyang gawin, ay laging nakakaalpas si Jerry. Minsan pa nga ay nababaliktad ni Jerry ang sitwasyon. Sa huli, si Tom ang nabibiktima ng sarili niyang patibong. Ngunit sa realidad pala hindi ganito ang nangyayari. Kagaya nun kay pusa at bubwit. Wala kasing writer na gagawa ng storyboard. Oo, may actors pa din sina pusa at daga lamang. Tayo o kami naman yun naging viewers. In reality kasi, ang mas malakas at malaki ang nagwawagi. Kaya si bubwit ay talo. Kumbaga walang matalino sa pagkakataong ito. Kasi kung may maisip man na paraan ang bubwit, kahit ano pa man yun. Wala pa din iyon silbi o laban sa mga kamay ng pusa. Dahil ang advantage sa eksena na ito, ay nasa pusa, na malaki, may tikas, lakas at bilis. Kaya dehado ang kawawang bubwit. Bigla tuloy pumasok sa isip ko na ganoon din pala ang eksena sa buhay ng mga tao sa lipunan, hindi ba? Sa environment na meron tayo, ang may kapangyarihan at mga mayayaman ang siyang nagwawagi, nananaig, sila ang pusa ng ating lipunan. Ang mga mahihirap, salat sa materyal na bagay at pangangailangan, mga kapos sa edukasyon at kalinangan, sila ang daga ng lipunan. Mga walang laban. Kahit saang aspeto kasi ng lipunan ang mga daga ay parang saling pusa lamang. Mga taga-sunod ng mga pusa. Kagaya ng sa pulitika, ang mga mayayamang pusa ay gagawin ang lahat, papatay ng kanyang kapwa pusa o pasusunurin ang mga daga para lang makuha ang inaasam na posisyon. Paglalaruan ang mga daga pag wala ng kapakinabangan ay saka na sila gagamit ng matatalim na ngipin, kakagatin, ngunguyain, kakainin, lulunukin, papatayin. Kagaya nun ginawa ng pusa sa bubwit pagkatapos paglaruan ay kakainin din pala. Kawawang bubwit.